O‘zbekistonda koronavirusga chalinish holatlari yana orta boshlashi ortidan 15 mart kuni Toshkent shahri hokimi Jahongir Ortiqxo‘jayev boshchiligida maxsus yig‘ilish bo‘lib o‘tdi. Poytaxtda karantin talablariga rioya qilinishi qat'iy nazoratga olinadi.

Bugun, 15 mart kuni poytaxt hokimligida Toshkent shahriga koronavirus infeksiyasi kirib kelishi va tarqalishi oldini olish bo‘yicha Toshkent shahar shtabi rahbari, Toshkent shahar hokimi Jahongir Ortiqxo‘jayev boshchiligida maxsus yig‘ilish bo‘lib o‘tdi.

Toshkent shahar hokimi o‘rinbosarlari, shahar sektor rahbarlari, tuman hokimlari va boshqarmalar rahbarlaridan iborat shtab a'zolari ham qatnashgan yig‘ilishda so‘nggi kunlarda Toshkent shahrida koronavirus infeksiyasiga chalinish holatlari ortayotgani yuzasidan Toshkent shahar Sog‘liqni saqlash bosh boshqarmasi hamda Sanitariya-epidemiologiya osoyishtalik va jamoat salomatligi xizmatining axboroti tinglangan.

Shuningdek, mavjud vaziyatni nazoratga olish, shaharning barcha tumanlari, mahallalari, ish joylari va ta'lim maskanlari, shuningdek, aholi ko‘p to‘planadigan bozorlar va savdo markazlari, jamoat transportlarida amaldagi karantin tartib-qoidalariga to‘liq rioya qilinishini ta'minlash muhimligi alohida ta'kidlab o‘tilgan.

«Poytaxt hududida koronavirus infeksiyasi keng tarqalishining oldini olish hamda amaldagi karantin talablari va sanitariya-gigiyena tartib-qoidalariga aholi tomonidan to‘liq rioya etilishini nazoratga olish bo‘yicha mas'ullarga topshiriq va ko‘rsatmalar berildi. Yig‘ilish yakunida shtabning tegishli qarori qabul qilindi», deyiladi ma'lumotda.

O‘zbekistonda so‘nggi kunlarda koronavirusga chalinish bilan bog‘liq yangi holatlar soni sezilarli darajada oshdi. SSV matbuot xizmati ma'lumotiga ko‘ra, 14 mart kuni yana 111 kishida virus aniqlangan va bu 2020 yilning dekabridan buyon eng yuqori ko‘rsatkich hisoblanadi.

14 mart kungi yangi holatlarning 93tasi Toshkent shahriga to‘g‘ri keladi. Qayd etish kerakki, O‘zbekistonda 2021 yilning yanvar-fevral oylarida kunlik o‘sish ko‘rsatkichlari 40dan oshmayotgandi - Toshkentda 7 yanvarda 3ta, 15 fevralda 4ta yangi holat qayd etilgan). 10 mart kuniga kelib yangi holatlar sonida keskin o‘sish qayd etildi - 71 yangi holat. 11 mart kungi pasayish (+45)dan keyin raqamlar muttasil ko‘tarila boshladi va har kuni yangi rekordlar qayd etilmoqda.

Ayni paytda tibbiyot muassasalarida 725 nafar bemor davolanmoqda, ulardan 141 nafari og‘ir, 23 nafari esa o‘ta og‘ir ahvolda.